Giklaro sa Department of Energy nga wala’y direktang epekto sa suplay sa lana sa Pilipinas ang ipatuman nga export ban sa China.
Sumala kang Energy Secretary Sharon Garin, nagtipig ang China sa ilang suplay sa lana tungod sa panginahanglan nga mapalig-on ang ilang reserves, human sa daghang lana nga ilang gipagawas sa merkado kaniadto.
Atol sa ilang pagsusi, nakig-coordinate ang DOE sa mga oil companies sa nasod ug wala nakit-i ang posibleng epekto sa suplay sa lokal nga merkado.
Aduna usab sa mga oil companies sa Pilipinas og long-term supply contracts nga ilang hugot nga gituman aron mapadayon ang suplay sa lana sa nasod.
Kahinumdoman nga gipahibalo sa China ang paghunong sa pag-export sa lana ngadto sa ubang nasod tungod sa gipaabot nga pagsaka sa presyo sa global oil market, ilabina taliwala sa nagpadayong kagubot sa Middle East.
Sa pagkakaron, padayon nga gibantayan sa DOE ang sitwasyon sa global oil market ug ang posibleng epekto niini sa suplay ug presyo sa lana sa Pilipinas.
