Gikinahanglan sa Malacañang ang hugot nga pagsusi sa alegasyon ni kanhing senador Antonio “Sonny” Trillanes IV kabahin sa giingong financial links sa Chinese government ug China-based corporations ngadto sa Cale88 Foods Corporation.
Matud ni Palace Press Officer ug Communications Undersecretary Claire Castro, dili angay pasagdan ang maong alegasyon kung adunay igong ebidensya nga mosuporta niini.
Sumala ni Triillanes ang giingong kapin ₱319 milyon nga financial inflows gikan sa Chinese government ug mga kompanyang nakabase sa China ngadto sa Cale88 Foods Corporation, nga konektado sa asawa ni Vice President Sara Duterte nga si Atty. Manases “Mans” Carpio.
Pagpasabot ni Castro nga mahimong adunay seryosong implikasyon sa nasud kung mapamatud-an ang maong koneksyon, ilabina kon nalambigit ang mga public official.
Apan giklaro sa Palasyo nga wala pa kini naghimog konklusyon bahin sa alegasyon samtang wala pa makumpirma ang mga detalye pinaagi sa opisyal nga mga rekord.
Gipasiugda usab ni Castro nga kinahanglan mahibal-an sa publiko ang mga alegasyon kon adunay igo ug kasaligan nga ebidensya nga mosuporta niini.
Samtang, nanawagan ang Palasyo nga malikayan ang bisan unsang kahimtang diin ang mga opisyal sa gobyerno mahimong makadaot sa interes ug soberanya sa Pilipinas.
