Gipahinumdoman gihapon ang mga katawhan sa Davao City nga magmatngon sa posibleng risgo sa pag-ulan nga dala sa Intertropical Convergence Zone o ITCZ.
Nakasasinati og cloudy conditions ug panagsa nga pag-ulan, kasagaran drizzle, ang pipila ka lugar sa siyudad kagahapong adlawa samtang padayon nga ginasubay sa City Disaster Risk Reduction and Management Office Operations Center o CDRRMO-OPCEN ang kahimtang sa panahon.
Gibantayan usab ang mga river channels sa siyudad, diin nagpabilin sa Code Green o safe level ang tanang suba base sa pinakabag-ong monitoring.
Gipahimangnoan ang mga residente nga magmatngon ilabina sa mga lugar nga dali bahaan o adunay posibilidad sa pagtaas sa tubig kon molig-on ang pag-ulan.
Gipasidan-an usab ang mga nagapuyo duol sa mga sapa ug suba nga magmonitor sa lebel sa tubig ug mosunod sa mga pahimangno sa mga otoridad.
Gipabilin usab nga malinawon ang kahimtang sa kadagatan ug low tide ang naobserbahan atol sa weather monitoring.
Gipadayon sa CDRRMO-OPCEN ang pagmonitor sa mga kondisyon sa panahon ug mga river channels alang sa paspas nga pagresponde kon adunay pagbag-o sa sitwasyon.
Gina-awhag ang katawhan nga magpadayon sa pagkuha og impormasyon gikan sa opisyal nga weather ug disaster advisories samtang nagpadayon ang epekto sa ITCZ.
