Nagpahigayon og parada ang mga residente sa Iran isip pagpakita sa ilang suporta sa gobyerno ug pagpahayag sa ilang pagkaandam sa pagdepensa sa nasod.
Gipakita sa Iranian military atol sa maong parada ang pipila sa ilang mga armas panggubat. Matud sa mga partisipante, andam sila nga manalipod sa ilang nasod batok sa bisan unsang posibleng pag-atake.
Gipangulohan ni Iranian President Masoud Pezeshkian ang parada uban sa mga sundalo, kapulisan ug mga commander sa Islamic Revolutionary Guard Corps o IRGC. Gipahigayon ang maong kalihukan sa Tehran isip pagpakita sa kahandam sa Iran sa posibleng pag-atake gikan sa Estados Unidos.
Kahinumduman nga gipahibalo ni US President Donald Trump nga sa umaabot nga mga adlaw iyang desisyunan kung unsang lakang ang ilang himuon batok sa Iran.
Sa pagkakaron, nagpadayon ang tensiyon tali sa Iran ug Estados Unidos samtang gisubay ang posibleng sunod nga mga lakang sa duha ka nasod.
