Gipangayo ni Davao City First District Congressman Paolo “Pulong” Duterte nga ipakita sa publiko ang mga ebidensya, dokumento, bidyo ug aktuwal nga mga proyekto nga giingong adunay problema, lakip ang mga gipasanginlang substandard ug ghost projects sa iyang distrito.
Kini human iyang giabi-abi ang pahayag ni NBI Director Melvin Matibag kalabot sa pag-imbestiga sa mga flood control projects sa First District sa Davao City.
Gipahayag ni Duterte nga naglaum siya nga adunay media coverage sa mga pagdungog kalabot sa maong imbestigasyon aron makita mismo sa publiko ang mga proyekto nga giingong adunay kakulangan o problema.
Sumala pa kang Duterte, gusto sa mga taga-Davao nga makita ang konkretong ebidensya, lakip ang mga dokumento, bidyo ug mismong mga proyekto nga gihisgutan sa imbestigasyon.
Gipasiugda usab sa kongresista nga kung seryoso ang imbestigasyon, kinahanglan nga parehas ang sukdanan sa pagsusi sa mga proyekto sa tanang lugar ug dili lamang sa usa ka distrito o siyudad.
Dugang pa niini, gipangutana ni Duterte si Congresswoman Ann Matibag kung unsa usab ang kahimtang sa mga alegasyon ug ebidensya kalabot sa mga proyekto sa iyang distrito, lakip na kung aduna bay mga dokumento ug bidyo nga mahimong isumite alang sa pagsusi.
Gipangutana usab niya kung ipasubpoena ba ang mga contractor nga Discaya nga giingong nalambigit usab isip contractor sa duha ka proyekto sa maong distrito, samtang iyang giingon nga adunay mga bidyo nga anaa kanila kalabot sa mga proyekto sa distrito ni Matibag ug sa mga Discaya.
Gipasiugda ni Duterte nga kung adunay makit-ang ghost o substandard projects, kinahanglan nga tanang susamang proyekto imbestigahan, Davao man o bisan asa nga bahin sa nasod.
Sumala pa niya, dili angay nga adunay piniling imbestigasyon, ug ang ebidensya maoy kinahanglang mahimong basihan sa pagtino kung adunay paglapas o problema sa mga proyekto.
Sa pagkakaron, giabiabi ni Duterte ang pagpadayon sa imbestigasyon sa NBI sa mga flood control projects sa iyang distrito ug gihangyo ang ahensya nga mahimong hayag sa publiko ang mga kalihokan niini, lakip ang pagpakita sa mga proyekto nga ilang gisusi.
Samtang, padayon pa ang pagsusi sa NBI sa mga dokumento ug ebidensya aron mahibal-an kung adunay iregularidad o laing paglapas nga nalambigit sa maong mga proyekto.
