Giaprobahan na sa House of Representatives sa ikatulo ug kataposang pagbasa ang House Bill No. 9642 o New Espionage Act, nga nagtumong sa pagpalapad sa balaod batok sa espionage ug uban pang bag-ong hulga sa national security.
Nakakuha ang balaod-non og 247 ka boto pabor, 10 batok ug walay abstention.
Ang HB 9642 unang naaprobahan sa ikaduhang pagbasa niadtong Septiyembre 7, 2026.
Gipalapdan sa balaod-non ang konsepto sa espionage aron masakop ang paggamit sa cyber networks, drones, financial channels ug pag-atake sa critical infrastructure isip pamaagi sa pagkuha o pagpadayag sa sensitibong impormasyon.
Lakip sa mga gi-target sa balaod ang dili awtorisadong paghawid o pagbutyag sa classified information, ilegal nga pag-access sa mga plano sa critical infrastructure ug defense facilities, ug dili awtorisadong pagsulod sa mga protektadong national defense assets.
Kung mahimong balaod, mahimong silotan og tibook kinabuhi nga pagkabilanggo ug multa nga P10 milyon hangtod P20 milyon ang espionage ug conspiracy to commit espionage.
Mahimong permanenteng mawad-an sa katungod sa paghawid og public office ang government officials nga mapamatud-ang nakalapas, samtang mahimong ipailalom sa court-martial ang mga miyembro sa militar nga makasala.
Lakip usab sa mga probisyon ang imbestigasyon sa Anti-Money Laundering Council sa mga pondo ug kabtangan nga konektado sa espionage offenses, ingon man ang pagpalig-on sa proteksyon sa sensitibong ebidensya pinaagi sa need-to-know principle.
Human sa approval sa Kamara, ang panukala kinahanglan pa nga maaprobahan sa Senado ug pirmahan sa Presidente aron mahimong balaod.
