Giplanong moapruba ang Estados Unidos sa pagbaligya ngadto sa Israel og hangtod sa 60,000 ka bomba.Kabahin sa bag-ong multibillion-dollar package deal tali sa duha ka nasod ang pagbaligya sa maong mga bomba, diin ang matag usa motimbang og 2,000 pounds o 907 kilograms.
Gi-aprobahan sa Trump administration ang maong deal ug opisyal na usab nga gipahibalo ang US Congress kabahin niini.
Mokabat sa $2.8 billion ang kinatibuk-ang kantidad sa kasabutan tali sa duha ka nasod. Gisaway sa daghang kritiko ang maong deal tungod kay naglakip kini sa pipila sa labing delikado ug labing makaguba nga mga armas panggubat.
Sa pagkakaron, wala pay klaro kung asa gamiton sa Israel ang dakong gidaghanon sa mga bomba samtang nagpadayon ang gubat niini sa Middle East.
Kahinumduman nga ang mga bomba nga motimbang og 2,000 pounds kasagarang gigamit alang sa ground penetration o pagsulod sa lig-on nga mga target ug pagpabuto sa underground bunkers, samtang mahimo usab kini nga hinungdan sa kaylap nga kadaot sa mga open areas.
