Nakasinati og pag-ulan ang pipila ka bahin sa Visayas ug Mindanao karong Miyerkules, Septyembre 16, 2026 tungod sa Intertropical Convergence Zone o ITCZ, sumala sa PAGASA.
Matud sa state weather bureau, magdala ang ITCZ og dag-um nga kalangitan, mga pag-ulan ug thunderstorms sa Visayas ug Mindanao.
Lakip sa mga lugar nga nakasinati og ulan ang Masbate, Eastern Visayas, Negros Island Region, Central Visayas, Zamboanga Peninsula, Northern Mindanao, Caraga, Davao Oriental ug Lanao del Sur.
Samtang, partly cloudy hangtod cloudy skies nga adunay isolated rainshowers ug localized thunderstorms sa Palawan ug ubang bahin sa Visayas ug Mindanao.
Sa Luzon, kasagaran nga init ug humid ang panahon ilabina sa udto hangtod hapon, apan posible gihapon ang isolated rainshowers gikan hapon hangtod gabii tungod sa localized thunderstorms.
Sa Davao City, anaa sa 25 ngadto sa 33 degrees Celsius ang temperatura.
Ang tropical depression nga anaa sa gawas sa Philippine Area of Responsibility adunay ubos nga posibilidad nga mosulod sa Pilipinas, apan mahimong makapalig-on sa Habagat ug magdala og dugang ulan sa kasadpang bahin sa nasud.
Giawhag ang publiko nga magmatngon sa mga pagbag-o sa panahon.
