Mainiton nga gidawat sa National Citizens’ Movement for Free Elections o NAMFREL ang pag-apruba sa Random Manual Audit Committee o RMAC sa Resolution No. 01, Series of 2026, diin gikonsidera ang pipila ka teknikal nga rekomendasyon alang sa Random Manual Audit sa Bangsamoro Autonomous Region in Muslim Mindanao Parliamentary Elections o BARMM PE.
Sumala pa sa resolusyon nga gipagawas niadtong Septiyembre 10, 2026, pormal nga gidawat sa RMAC ang Observation Nos. 1, 2, 3, 4 ug 7 sa NAMFREL aron mapalig-on ang integridad, transparency ug kasaligan sa proseso sa manual audit.
Gimandoan usab sa RMAC ang Technical Working Group niini o RMA-TWG ug ang Philippine Statistics Authority o PSA nga ilakip ang maong mga lakang sa pagpatuman sa audit alang sa umaabot nga makasaysayanong eleksyon sa BARMM.
Samtang, wala aprobahi sa komite ang Observation No. 6 aron mapadayon ang kasamtangang sampling parameters nga gitakda ubos sa balaod ug mga resolusyon sa Commission on Elections o COMELEC.
Gipadayon usab sa NAMFREL ang ilang pagsuporta sa mga lakang alang sa dugang nga pagpalambo sa sakop ug pamaagi sa Random Manual Audit, bisan pa man sa desisyon sa komite.
Dugang pa niini, isip accredited citizen’s arm, mipasalig ang NAMFREL nga magpadayon sa pagmonitor sa Random Manual Audit aron masiguro nga hustong maihap ug mapanalipdan ang matag boto sa BARMM elections.
Sa pagkakaron, gilauman nga makatabang ang mga giaprobahang rekomendasyon sa pagpalig-on sa transparency ug pagsalig sa proseso sa pag-audit sa maong makasaysayanong eleksyon.
