Gitarget sa House prosecution panel nga mahuman sa una o ikaduhang semana sa Oktubre ang presentasyon sa ilang mga ebidensya batok kang Vice President Sara Duterte kalabot sa giingong unexplained wealth.
Matod ni Bicol Saro Party-list Representative Terry Ridon, apil sa ilang final schedule ang posibilidad nga dili dawaton sa defense panel ang 104 requests for admission nga gisumite sa prosecution.
Pagpasabot ni Ridon nga posible usab nga dili na tawagon ang tanang testigo sa ilang listahan kung makita nilang igo na ang mga dokumentong mapresentar ngadto sa impeachment court.
Lakip sa mga nag-unang ebidensya nga giandam sa prosecution ang bank ug tax records nga may kalabotan kang Duterte, sa iyang bana, ug sa ilang mga kompanyang gipanag-iya.
Human sa presentasyon sa unexplained wealth, giingon ni Ridon nga sunod dayon nilang ipresentar ang mga ebidensya alang sa bribery case o tapuson ang uban pang nahibiling bahin sa ilang presentasyon.
Kumpiyansa usab ang prosecution team nga makompleto nila ang tanang gikinahanglan nga dokumento ug mga testigo sa dili pa moabot ang Lunes.
