Namatay ang 10 ka tawo samtang 64 ang nasamdan human mibuto ang mga gitagong fireworks duol sa Santa María Canchesdá sa Mexico atol sa usa ka religious festival.
Gihimo ang selebrasyon alang sa kapistahan sa Our Lady of Light sa dihang kalit mibuto ang mga paputok nga gitipigan duol sa lugar.
Tungod sa kusog sa pagbuto, nadaot ang bahin sa simbahan ug adunay pipila ka tawo nga na-trap sulod sa estruktura, hinungdan nga gilayon nga gipadala ang rescue ug emergency teams.
Lakip sa mga nasamdan ang duha ka pari ug pipila ka mga bata nga gidala dayon sa mga health facility alang sa medical treatment.
Padayon usab ang clearing operations sa lugar aron masiguro nga wala nay laing tawo nga natanggong ilawom sa mga debris gikan sa nadaot nga bahin sa simbahan.
Nagpadayon karon ang imbestigasyon sa mga awtoridad aron matino kung giunsa pagkabuto ang mga fireworks ug kung adunay paglapas sa safety regulations sa pagtipig niini.
Gipahugtan usab ang pagbantay sa palibot samtang gisusi ang kahimtang sa mga nasamdan ug ang tibuok kadaot nga nahimo sa insidente.
Wala pa usab ipahibalo kung adunay kasong ipasaka human sa imbestigasyon.| VIA BOMBO EROS PAJOTA
