Nagpagawas ang Bureau of Internal Revenue o BIR, ubos sa pagpangulo ni Commissioner Charlito Martin R. Mendoza, og bag-ong BIR Audit Program aron mapalig-on ang risk-based audits ug accountability sa tibuok nasud.
Gibase ang maong programa sa Revenue Memorandum Order o RMO No. 22-2026 nga gipirmahan niadtong Agosto 24, 2026, diin gipahiusa sa ahensya ang mga naunang programa aron adunay kinatibuk-ang mga lagda ug sumbanan sa pagsusi sa buhis.
Ubos sa bag-ong sistema, gipakusgan ang Single-Instance Audit Framework diin kasagarang gilimitahan sa usa lamang ka electronic Letter of Authority ang pag-audit sa usa ka taxpayer alang sa matag taxable year.
Gamiton usab sa BIR ang automated ug anonymized nga mga pamaagi sa pagpili sa mga priority case base sa risk-based data aron maminusan ang personal nga pagdesisyon sa mga opisyal sa pagpili sa mga susihon.
Dugang pa, gihimong institusyonal ang taxpayer o Revalida aron masiguro nga ang mga tax assessment nga ipagawas sa mga auditor nagsunod sa hustong proseso, balaod ug mga kamatuoran nga nakolekta atol sa pag-audit.Sumala pa, gitumong sa maong reporma nga mapalig-on ang transparency, accountability ug pagkahusto sa proseso sa pag-audit sa buhis sa tibuok nasud.
Lakip sa gisuportahan sa maong reporma ang mando ni Pangulong Ferdinand R. Marcos Jr. ug Finance Secretary Frederick D. Go nga palig-onon ang pagsalig sa publiko sa gobyerno ug pauswagon ang ease of doing business sa nasud.
Sa pagkakaron, gilauman nga makatabang ang bag-ong sistema sa paghimo sa proseso sa tax audit nga mas patas, mas sistematiko ug mas nakabase sa datos, samtang mapalambo ang pagpanubag sa mga opisyal sa BIR.
Kahinumduman, ang BIR mao ang nag-unang ahensya sa gobyerno nga responsable sa pagpatuman ug pagpatigayon sa mga balaod bahin sa buhis aron makolekta ang gikinahanglang kita alang sa mga programa ug serbisyo sa nasud.
