Padayong nakaapekto sa Metro Manila ang haze nga gituohang resulta sa sa mga wildfire sa Kalimantan, Indonesia, diin tulo ka lugar ang nakatala og “acutely unhealthy” nga kalidad sa hangin.
Base sa monitoring sa DENR-Environmental Management Bureau sa National Capital Region (EMB-NCR) kaniadtong Martes sa gabii, Setyembre 1, naka-record og Air Quality Index (AQI) nga 229 sa Don Bosco, Parañaque; 215 sa Las Piñas; ug 202 sa Quezon City-Ateneo.
Adunay “very unhealthy” nga lebel usab ang kalidad sa hangin sa napulo pa ka monitoring areas sa Metro Manila, lakip ang Makati, Malabon, Mandaluyong, Manila, Marikina (Parang), Muntinlupa (Filinvest), Quezon City (Commonwealth), San Juan City, Taguig (TUP), ug Valenzuela.
Gipasabot sa DENR-EMB nga posibleng nadala sa Southwest Monsoon o Habagat paingon sa Pilipinas ang aso gikan sa nagpadayong mga sunog sa Kalimantan. Posible usab nga magpadayon ang haze hangtod Setyembre 3 samtang aktibo pa ang mga sunog.
Nagpahimangno ang mga lokal nga panggamhanan sa publiko nga magsul-ob og face mask kung mogawas sa ilang mga panimalay.
