Nagpasidaan ang Bangko Sentral ng Pilipinas (BSP) sa Department of Agriculture (DA) kabahin sa dakong hulga sa suplay ug presyo sa pagkaon tungod sa grabeng hulaw nga dala sa El Niño.
Dugang nga kabalaka ang padayong kagubot sa global nga merkado ug presyo sa bugas, nga mahimong mosamot pa sa pressure sa lokal nga suplay sa pagkaon.
Kauban sa maong pasidaan ang 25-basis-point nga pagsaka sa key interest rate sa BSP isip lakang batok sa padayong inflation. Wala usab gisalikway sa central bank ang posibilidad sa dugang nga monetary action kung magpadayon ang pagsaka sa presyo sa mga batakang palaliton.
Mas mabalaka ang kahimtang tungod sa paghinay sa sektor sa agrikultura, diin mikunhod og 4.85% ang produksyon sa palay kaniadtong 2024. Misaka usab og 21 porsyento ang All Rice Price Index niadtong 2023 human magpatuman ang India og export ban sa bugas tungod sa hulga sa El Niño.
Tungod niini, mahimong dugang nga maipit ang lokal nga suplay sa pagkaon kung mosamot ang hulaw, ilabina samtang dili lig-on ang kahimtang sa global nga merkado sa bugas.
Gimandoan ni Agriculture Secretary Francisco Tiu Laurel Jr. ang tanang ahensya sa DA nga ipadayon ang pag-ayo ug pagpalig-on sa ilang El Niño response plans.
Sumala usab sa DA, gamiton nila ang pinakabag-ong datos bahin sa panahon, kahimtang sa mga pananom, suplay sa tubig ug lihok sa merkado aron maminusan ang epekto sa hulaw.
Lakip sa mga lakang ang cloud seeding, pagtukod og solar irrigation, ug pagbalhin sa produksyon ngadto sa mga rehiyon nga dili kaayo apektado sa hulaw.
Apil usab sa giandam nga tabang ang pag-apod-apod og mga liso nga lig-on batok sa hulaw, crop insurance, ug direktang pinansyal nga ayuda alang sa mga mag-uuma nga maapektuhan.
