Patay ang unom ka tawo, samtang tulo pa ang padayon nga gipangita ug upat ang naluwas human nabaliskad ang usa ka motorbanca sa Lake Mapanuepe sa San Marcelino, Zambales niadtong Huwebes, sumala sa Philippine Coast Guard o PCG.
Gibanabana nga 13 ka tawo ang sakay sa motorbanca, nga mga miyembro sa Aeta Community. Sumala sa PCG, nahitabo ang insidente pasado alas dos sa hapon duol sa Sunken Church sa Barangay Buhawen.
Miadto unta ang mga miyembro sa Aeta Community aron modawat og pagkaon ug tambal, lakip ang pag-apil sa vaccination program sa health center.
Sa inisyal nga imbestigasyon, nasinati sa motorbanca ang kusog nga hangin ug balod sa tubig nga posibleng misangpot sa pagkabaliskad niini.
Gipahayag sa San Marcelino Public Information Office ang pahasubo niini ngadto sa mga pamilyang naapektuhan sa maong trahedya.
Sa kasamtangan, gipadayon sa PCG karong Biyernes ang search and rescue operations alang sa tulo pa ka pasaherong padayon nga gipangita.
