Misaka na sa dul-an 390 ang kumpirmadong patay samtang kapin 1,400 pa ang missing human sa grabeng glacier ug rock collapse nga mipahinabo og makagun-ob nga flash flood sa Nepal ug Tibet region sa China.
Sumala sa mga otoridad, dili moubos sa 389 ang namatay sa Nepal samtang tulo ang kumpirmadong patay sa Tibet.
Lakip sa mga missing ang gatusan ka local residents ug foreign tourists gikan sa India, United States, United Kingdom, Canada, Australia ug China.
Nalisdan ang search and rescue operations tungod sa mga naguba nga kalsada ug tulay sa mountainous areas.
Tungod niini, gigamit na sa rescue teams ang mga helicopter aron maghatod og pagkaon, tambal ug mga tolda ngadto sa mga apektadong lugar ug aron ma-evacuate ang mga nasamdan.
Base sa assessment sa mga scientist, ang trahedya gipahinabo sa pagkahugno sa dakong bahin sa glacier ug mga bato sa Lhende River, nga kusog nga mibanlas ngadto sa mga lungsod ug kapatagan.
Samtang, nagpadala na ang United Nations ug nagkalain-laing nasud og milyon-milyong dolyar nga emergency aid ug initial assistance alang sa mga komunidad nga naapektuhan sa kalamidad.
