Gitun-an sa Department of Agriculture ang paggamit og drones ug artificial intelligence o AI aron mas mapalambo ang smart farming ug mapataas ang produksyon sa agrikultura sa nasod.
Pinaagi sa maong teknolohiya, mahimong mas sayo nga matagna ug mahibal-an ang posibleng mga problema nga makaapekto sa mga pananom.
Mahimo usab gamiton ang drones sa pagbantay sa kahimtang sa uma ug pagkuha og impormasyon nga makatabang sa mga mag-uuma sa pagdesisyon kung unsang lakang ang kinahanglan buhaton.
Samtang, ang AI mahimong makatabang sa pag-analisar sa datos aron matagna ang posibleng ani ug makita ang mga risgo sa mga pananom sa mas sayong panahon.
Tumong sa DA nga pinaagi sa paggamit sa modernong teknolohiya, mapataas ang ani sa mga uma ug maminusan ang posibleng pagkawala sa produksyon.
Gilauman usab nga makatabang ang smart farming sa pagpalig-on sa food security sa Pilipinas ug pagpaayo sa produksyon sa sektor sa agrikultura.
