Nasakpan sa kapulisan ug Task Force Davao ang duha ka giila nga high-value drug personality human makuhaan og gituohang shabu sa fixed checkpoint sa Brgy. Mahayag, Bunawan District, Davao City niadtong miaging adlaw.
Nahimo ang pagdakop pasado alas-4 sa hapon atol sa routine inspection sa mga sakyanan nga mosulod sa checkpoint nga hiniusang gipahimutang sa Police Station 6-Bunawan ug Task Force Davao.
Atol sa inspeksyon, nakita sa mga otoridad ang gituohang ilegal nga droga, hinungdan sa pagdakop sa duha ka indibidwal.
Nasakmit gikan kanila ang gituohang shabu nga adunay estimated standard drug price nga P303,960.
Gidayeg ni Davao City Police Office City Director PCol. Peter Bauzon Madria ang Police Station 6-Bunawan, nga gipangulohan ni PMaj. Janus Lumbaya Macli-ing, ug Task Force Davao sa maong operasyon.
Padayon ang imbestigasyon ug pagproseso sa kaso batok sa mga nadakpan kalabot sa nasakmit nga ilegal nga droga. | VIA BOMBO EROS PAJOTA
