Nakakuha ang gobyerno sa Pilipinas og 200 million euros o mga $230 million nga financing gikan sa French development agency nga Agence Française de Développement o AFD alang sa pagpanalipod sa marine ecosystems ug pagpalambo sa blue economy.
Matud sa Department of Finance, tugbang kini sa mga ₱14 billion ug gamiton kini alang sa Marine Ecosystem for Blue Economy Development o MEBED 1 program.
Gilauman nga makahatag ang programa og malungtarong panginabuhi sa kapin tulo ka milyon ka tawo, lakip ang mga mangingisda, aquaculture operators ug tourism workers.
Tutokan sa MEBED ang pagpanalipod sa dagat, pagpalambo sa solid waste management ug husto nga paggamit sa marine resources.
Sumala ni Finance Secretary Frederick Go, importante ang pagpanalipod sa marine resources aron maprotektahan ang panginabuhi sa mga coastal communities ug mapalig-on ang depensa batok sa climate change.
Ikaduha na kini nga 200-million-euro financing nga nakuha sa DOF gikan sa AFD ning semanaha.
Una usab nga nakakuha ang programa og 200 million euros gikan sa Germany’s KfW Development Bank ug $500 million nga loan gikan sa Asian Development Bank.
