Gibutyag sa law professor nga si Atty. Jennifer Reyes nga mahimong mahinungdanon sa pag-uswag sa impeachment trial ni Vice President Sara Duterte ang testimonya nina Gina Acosta ug Edward Fajarda, nga gilauman ipatawag sa House prosecution panel.
Lakip sa duha si Fajarda, kanhi special disbursing officer sa Department of Education (DepEd), samtang si Acosta kanhi special disbursing officer sa Office of the Vice President (OVP).
Matud ni Reyes, importante ang testimonya sa duha aron masubay kung asa napadulong ang mga tseke nga gi-encash gamit ang confidential and intelligence funds o CIF sa duha ka maong opisina.
Dugang pa niini, mahimong mahatagan og dakong pagtagad ang ilang pag-atubang sa witness stand tungod kay sila ang giingong adunay kahibalo sa “trail” sa hangtod P612.5 milyon nga CIF sa OVP ug DepEd.
Gipaabot usab ni Reyes nga mahimong mahibaw-an pinaagi sa ilang testimonya kung aduna bay mga indibidwal nga nakadawat sa pondo human ma-encash ang mga tseke.
Sumala pa niya, kung masubay ang mga nakadawat sa kuwarta, mahimo usab silang ipatawag pag-usab pinaagi sa subpoena aron motubag atol sa Senate impeachment court.
Sa kasamtangan, gipaabot usab ang tubag nina Acosta ug Fajarda kung ilang angkunon ang posibleng mga sayop, ipatin-aw ang ilang bahin aron malimpyohan ang ngalan sa bise presidente, o kung aduna pay ubang dagkong personalidad nga mahimong madawit sa maong isyu.
