Gibulgar ni kanhing DPWH Sec. Manuel Bonoan sa Sandiganbayan nga ang tanang senador nakadawat kuno og gitawag nga “leadership fund” gikan sa DPWH sugod pa kaniadtong 2024.
Matud ni Bonoan, gibanabana-ang ₱500 million ang alokasyon matag senador, samtang moabot sa ₱1 billion alang sa mga senador nga chairperson sa mga komite.
Sa kinatibuk-an, giingon niyang mokabat sa ₱24 billion ang maong leadership fund nga giingong anaa kaniadto sa diskresyon ni kanhing Senate President Juan Miguel Zubiri ug mahimo pa kunong dugangan.
Apan subling gilimod ni Zubiri ang alegasyon ug miingon nga wala siya naghupot o nangayo og project list gikan sa mga senador. Matud niya, ang mga request sa proyekto moagi sa Senate Committee on Finance ug dili sa iyang opisina. Gipunting usab niya nga walay problema sa institutional amendments alang sa mga dalan, tulay, airport ug uban pang infrastructure basta legal, transparent ug husto ang pagpatuman.
Gibutyag ni Bonoan nga nangayo kuno si kanhing DPWH Undersecretary Roberto Bernardo og listahan sa mga proyekto gikan nila kanhing Sen. Bong Revilla ug Sen. Jinggoy Estrada.
Dugang niini nga nagsumite usab og project list sila Sen. Bong Go ug Sen. Robin Padilla, samtang nagpasalamat kuno kaniya sila Padilla ug Sen. Imee Marcos tungod sa iyang “assistance.”
Hugot usab nga gihimakak ni Go ang pasangil ni Bonoan ug gihagit ang kahing kalihim nga ipaklaro ang basihan sa iyang alegasyon.
Samtang, miingon si Senadora Imee Marcos nga wala siya kahibalo sa giingong “pasalamat,” ug giklaro nga kasagaran siyang magpasalamat sa mga ahensya kung adunay proyekto sa Ilocos Norte.
Sa pagka karun, padayon ang pagkuha sa Bombo Radyo Philippines og tubag sa ubang senador nga nalambigit sa maong alegasyon.
