Mikabat sa P2.003 trilyon ang kinatibuk-ang koleksyon sa Bureau of Internal Revenue o BIR gikan Enero hangtod Hulyo 2026.
Nalapas niini ang target nga P1.990 trilyon alang sa maong panahon og P13.53 bilyon o 0.68 porsyento.
Mas taas usab og P102.60 bilyon ang pito ka bulan nga koleksyon kumpara sa susamang panahon niadtong miaging tuig, nga nagpakita og 5.4 porsyento nga year-on-year growth.
Matud ni BIR Commissioner Charlito Martin R. Mendoza, nakolekta na sa ahensya ang hapit 60 porsyento sa ilang kinatibuk-ang target alang sa tibuok tuig nga 2026.
Gipasabot ni Mendoza nga nagpakita kini sa nagkataas nga compliance sa mga taxpayer, lakip ang padayong paningkamot sa mga Revenue Region, Revenue District Office ug Large Taxpayers Service.
Alang lamang sa Hulyo, mikabat sa P358.44 bilyon ang gross collection sa BIR.
Nalapas niini ang monthly target nga P336.07 bilyon og P22.37 bilyon o 6.66 porsyento.
Mas taas usab kini og P19.41 bilyon kumpara sa koleksyon niadtong Hulyo sa miaging tuig, nga miabot sa 5.73 porsyento nga growth.
Matud pa usab ni Mendoza, ipadayon sa BIR ang ilang lima ka punto nga reform agenda nga “BIR DARES” aron mapalapad ang digital services, mapasayon ang proseso sa pagbayad sa buhis, ug mas hugot nga mapatuman ang balaod batok sa mga dili husto ang pagbayad sa buhis.
| via Bombo Ray Ann Martinez
