Gilauman sa Commission on Elections ang klarong desisyon sa Kongreso kung madayon ba o ma-postpone ang Barangay ug Sangguniang Kabataan Elections nga nakatakda sa Nobyembre 2, 2026.
Matud ni COMELEC Chairman George Garcia, duha pa ka hearing ang ipahigayon aron madungog ang posisyon sa mga stakeholder kabahin sa mga proposal nga ipalangan ang eleksyon.
Giklaro usab niini nga dili manghilabot ang COMELEC sa mahimong desisyon sa Kongreso.
Kinahanglan matud pa nga mahibal-an dayon sa poll body ang pinal nga desisyon aron adunay igong panahon sa pag-adjust sa ilang election preparations.
Importante matud pa ang tukmang timetable tungod kay dungan sa preparasyon alang sa BSKE ang sayong pagpangandam sa COMELEC alang sa 2028 National and Local Elections.
Sa laing bahin, manginahanglan og dugang ₱3 billion ang ilang buhatan sa matag tuig nga ma-postpone ang piniliay gumikan kay ₱8 billion na ang nagasto sa komisyon gikan sa kinatibuk-ang ₱19 billion nga budget niini.
Kung madelatar na usab ang eleksyon adunay mga supplies sama sa indelible ink ug ballpen nga posibleng madaot, ma-expire o dili na magamit kung dugay kining matipigan.
Hinuon, mahimo pa gihapong magamit ang pipila sa mga election materials nga daan nang napalit ug naandam.
Gipunting ni Garcia nga usa usab sa hinungdan sa dugang gasto mao ang gipaabot nga pagsaka sa gidaghanon sa mga rehistradong botante kung mapalugwayan ang petsa sa eleksyon.
Sa pagkakaron, magpadayon ang COMELEC sa pagpangandam samtang ginahulat ang sunod nga lihok sa Kongreso kabahin sa posibleng postponement sa BSKE.
