Gisugdan na sa City Government of Davao ang BALAI Calinan Housing Project sa Brgy. Talomo River, Calinan District human sa groundbreaking ceremony niadtong Martes, Agosto 11.
Pinaagi sa Davao City Housing Office, tumong sa proyekto nga makahatag og desente, barato ug malungtarong puy-anan alang sa mga kwalipikadong Dabawenyo.
Ang housing project tukoron sa dul-an 121,378 square meters nga yuta nga gidonar sa BRIA Homes Inc. ngadto sa dakbayan.
Gipaabot nga mokabat sa 630 ka socialized housing units ang mahimong mapahimutang sa maong lugar ubos sa Public Rental Transitory Housing Scheme sa siyudad.
Kabahin sa proyekto ang panagtambayayong sa Davao City Government, Department of Human Settlements and Urban Development o DHSUD, BRIA Homes Inc. ug Vistaland Lifescapes Inc.
Gilauman nga makatabang ang proyekto sa mga kwalipikadong pamilya nga nanginahanglan og mas lig-on ug abot-kayang kapuy-an samtang gipadayon sa lokal nga kagamhanan ang housing programs sa Davao City. | VIA BOMBO EROS PAJOTA
