Gipasalig sa Department of Agriculture o DA nga ipadayon sa gobyerno ang programa sa pagbaligya og P20 kada kilo nga bugas alang sa mga kwalipikadong benepisyaryo hangtod matapos ang termino ni Pangulong Ferdinand Marcos Jr. sa 2028.
Sumala sa DA, kapin 12 milyon na ka Pilipino ang nakabenepisyo sa programang “Benteng Bigas, Meron Na,” nga gitumong alang sa mga vulnerable sectors.
Ang bugas nga gibaligya sa ubos nga presyo gikan sa stock sa National Food Authority o NFA, nga nagpalit usab og palay direkta gikan sa lokal nga mga mag-uuma. Sa pagkakaron, adunay kapin 500 mil metric tons nga stock ang NFA, nga giingong igo aron masuplayan ang programa.
Gitinguha usab sa DA nga palapdan ang Kadiwa sites gikan sa kasamtangang 807 ngadto sa 1,500 hangtod 2,000 ka sites sa umaabot nga mga bulan aron mas daghan pa ang maka-access sa barato nga bugas.
Samtang, giingon sa DA nga hinay-hinay nang mikunhod ang presyo sa bugas sa merkado, diin ang premium rice anaa sa 47 hangtod 48 pesos kada kilo, samtang ang regular milled rice anaa sa 35 hangtod 45 pesos.
Gipasalig usab sa ahensya nga igo ang suplay sa bugas hangtod sa sunod nga anihan, samtang dili usab pagadid-an ang rice imports tungod sa pagpangandam sa posibleng epekto sa El Niño sa food supply.
