Miabot na sa 80,000 ka mga indibidwal o kapin sa 23,000 ka pamilya ang naapektuhan sa hiniusang epekto sa bagyong Maymay, habagat ug sa miaging bagyong Luis, sumala sa Office of the Civil Defense (OCD).
Natala ang mga apektadong pamilya sa Ilocos Region, Cagayan Valley, Central Luzon, Zamboanga Peninsula, Bangsamoro Autonomous Region in Muslim Mindanao (BARMM), ug Cordillera Administrative Region.
Sa mga naapektuhang pamilya, kapin sa 2,000 ang gipahawa gikan sa ilang mga panimalay ug gipapuyo sa mga evacuation center.
Base sa pinakabag-ong datos sa OCD, wala pay natalang namatay, nasamdan, o nawala tungod sa dili maayong kahimtang sa panahon.
Samtang, nakarekord usab ang OCD og 12 ka balay nga nadaot, ug ang tanan nakasinati lamang og gagmayng kadaot.
Nakatala usab og pagbaha sa 83 ka mga lugar sa Ilocos Region, Cagayan Valley, Zamboanga Peninsula, ug BARMM.
Samtang nagpadayon ang epekto sa kalamidad, gipasalig sa Department of Social Welfare and Development (DSWD) nga andam silang motabang sa mga apektadong pamilya pinaagi sa mga naka-preposition nga family food packs ug standby funds kon gikinahanglan.
