Gipalangay ni U.S. President Donald Trump ang planong bag-ong pag-atake batok sa Iran samtang nagpadayon ang negosasyon aron mapahunong ang nuclear program sa Tehran ug maabli pag-usab ang Strait of Hormuz.
Sumala pa ni Trump sa iyang post sa Truth Social nga miuyon siyang dili una ipadayon ang pag-atake human giingong mihangyo ang Iran ug pipila ka mga nasud sa Middle East og dugang panahon aron makompleto ang usa ka kasabutan.
Gitumong sa negosasyon ang hingpit nga pagpasig-uli sa operasyon sa Strait of Hormuz ug ang pagpahunong sa hulga sa nuclear program sa Iran.
Gipadayag sa Presidente nga nagsuporta usab ang Israel sa maong temporaryong lakang, apan gipasabot niyang mahimo gihapon nga ipadayon ang pag-atake kung mapakyas ang mga panaghisgot sa kalinawan.
Gipasiugda sa Israel nga magpadayon kini sa paglihok batok sa Iran kung ipadayon pag-usab sa Tehran ang nuclear program o ang pagpalig-on sa ballistic missile capabilities niini.
Miingon ang Acting Defense Minister sa Iran nga giisip lamang nila nga kabahin sa “psychological warfare” ang mga hulga sa Estados Unidos, apan gipasalig nga andam gihapon ang ilang militar sa bisan unsang posibleng pag-atake.
Nanawagan usab ang Saudi Arabia nga ipadayon ang diplomasya ug dayalogo aron mapakunhod ang tensyon sa rehiyon.
