Gipaklaro ni Defense Secretary Gilberto “Gibo” Teodoro Jr. ang iyang pahayag nga kinahanglan mobiya sa katungdanan ang mga opisyal sa gobyerno nga dili mosuporta sa barugan sa Pilipinas sa West Philippine Sea (WPS).
Sumala pa ni Teodoro nga dili mahimong pugson ang usa ka opisyal sa pag-resign tungod lamang sa personal nga opinyon o pagtuo gawas kung adunay paglapas sa balaod o regulasyon.
Gipasiugda niya nga ang polisiya sa WPS nakabase sa Administrative Order No. 29, Series of 2012, nga nagtakda sa mga maritime area sa kasadpang bahin sa nasud isip West Philippine Sea, busa kabahin kini sa balaod sa Pilipinas.
Gipasabot sa kalihim nga kung adunay opisyal nga dili mouyon sa opisyal nga barugan sa Pilipinas, mahimo nilang idala ang isyu sa korte aron kuwestiyonon ang legalidad sa polisiya, apan hangtod walay desisyon ang korte, obligado silang motuman sa balaod.
Dugang pa nga kung dili kini madawat sa ilang konsensya, ang usa ka legal nga kapilian mao ang pag-resign.
Gipunting usab niini nga importante kini samtang nagpasaka ang Pilipinas pinaagi sa Department of Foreign Affairs (DFA) og aplikasyon alang sa extended continental shelf nga naglakip sa katubigan sa palibot sa Bajo de Masinloc o Panatag Shoal, nga kabahin sa West Philippine Sea ubos sa Administrative Order No. 29.
Gibatikos usab ni Teodoro ang mga sayop nga balita ug mga headline nga, matod niya, naghatag og sayop nga pagsabot sa iyang mga pahayag.
Gihangyo niya ang publiko nga basahon ang iyang tibuok nga pahayag aron malikayan ang pagtuo sa sayop nga impormasyon.
