Gi-imbestigahan karon sa Office of the Ombudsman ang usa sa ilang mga personnel human sa giingong kakulangan sa pagproseso sa counter-affidavit nga gisumite ni Senador Robin Padilla may kalabotan sa reklamong obstruction of justice. Sumala pa kang Ombudsman Jesus Crispin Remulla, napamatud-an nga nakasumite si Padilla sa iyang counter-affidavit, sukwahi sa naunang impormasyon nga wala kuno kini motuman sa mando sa Ombudsman.
Dugang pa niini, gipatin-aw ni Remulla nga adunay nahitabong kakulangan sa dokumentasyon human wala matala sa Central Records ang maong dokumento ug hinuon direktang napadala ngadto sa investigating division.
Tungod niini, gipadayag sa Ombudsman nga nakapadala na siya og sulat kang Padilla aron ipatin-aw ang nahitabong sayop sa maong proseso. Matud pa ni Remulla, seryoso nga paglapas ang dili hustong pagdumala sa mga opisyal nga dokumento sa usa ka ahensya sama sa Ombudsman, maong gilusad na ang disciplinary investigation batok sa personnel nga nalambigit sa insidente.
Kahinumduman nga ang reklamong obstruction of justice batok nila Senador Robin Padilla, Senador Alan Peter Cayetano, ug kanhi Senate Sergeant-at-Arms Mao Aplasca gisang-at sa Tindig Pilipinas, may kalabotan sa giingong pagtabang kang Senador Ronald “Bato” dela Rosa aron makalikay sa warrant of arrest nga giisyu sa International Criminal Court (ICC).
