Gibasura sa South Korea police ang reklamo nga gisang-at batok sa aktor nga si Kim Soo Hyun nga may kalabutan sa alegasyon nga nakigrelasyon matud siya sa namatay nga aktres nga si Kim Sae Ron samtang menor de edad pa kini.
Base sa report sa Yonhap News Agency, nakahukom ang Seoul Seongdong Police Station nga dili na ipadayon ang kaso tungod sa kakulang sa ebidensya.
Nagsugod ang isyu human giakusahan sa pamilya ni Kim Sae Ron ang aktor nga nakigrelasyon matud siya sa aktres samtang menor de edad pa kini.
Misamot ang kontrobersiya human magpagawas og mga alegasyon ang YouTube channel nga HoverLab Inc. batok kang Kim Soo Hyun.
Niadtong Abril 2025, misang-at usab og civil lawsuit ang aktor batok sa pamilya ni Kim Sae Ron ug sa mga nagdumala sa maong YouTube channel.
Hugot nga gilimod ni Kim Soo Hyun ang mga akusasyon.
Matod niya, adunay relasyon sila ni Kim Sae Ron sulod sa hapit usa ka tuig, apan nahitabo kini sa panahon nga pareho na silang hamtong sa edad.
Gilimod usab sa aktor ang mga pahayag nga adunay kalabotan siya sa pagkamatay sa aktres.
Namatay si Kim Sae Ron niadtong Pebrero 2025 sa edad nga 24.
Nailhan siya sa mga pelikulang “A Brand New Life” ug “The Man From Nowhere,” ingon man sa mga seryeng “Hi! School Love On,” “Can You Hear My Heart,” ug “The Queen’s Classroom.”
Samtang, si Kim Soo Hyun usa sa labing nailhan nga South Korean actors nga misikat pinaagi sa mga sikat nga drama sama sa “Queen of Tears,” “It’s Okay to Not Be Okay,” ug “My Love from the Star.”
