Gibutyag ni Defense Secretary Gilberto “Gibo” Teodoro Jr. ang kamahinungdanon sa Pax Silica Project, nga iyang gihulagway isip dakong lakang aron mapalig-on ang national resilience sa Pilipinas taliwala sa mga batikos batok sa planong pagtukod og technology ug advanced manufacturing hub sa New Clark City.
Sumala pa kang Teodoro, makatabang ang maong proyekto sa modernisasyon sa Armed Forces of the Philippines (AFP), tungod kay ang kita gikan sa kanhing mga military lands nga gidumala sa Bases Conversion and Development Authority (BCDA) igahin alang sa AFP Modernization Program, subay sa nagpatuman nga balaod. Dugang pa niini, gipasabot sa kalihim nga ang proyektong gisuportahan sa Estados Unidos makatabang sa pagpakunhod sa pagsalig sa Pilipinas sa usa lamang ka tinubdan sa semiconductors ug makapalig-on sa supply chain kauban ang mga kaalyadong nasud.
Gidugang pa ni Teodoro nga gilauman nga makamugna ang proyekto og dul-an sa 200,000 ka trabaho ug makahatag og kapin ₱180 bilyon nga kita matag tuig sa higayon nga kini hingpit nang mapalihok. Bisan pa man niini, giila sa kalihim ang mga kabalaka nga may kalabotan sa posibleng epekto sa kinaiyahan, paggamit sa tubig ug elektrisidad, ingon man sa partisipasyon sa mga langyawng kompanya.
Gibarugan ni Teodoro nga ang tanang kompanyang moapil sa proyekto magpabiling obligado sa pagsunod sa environmental ug sustainability standards. Sa pagkakaron, gibutyag sa kalihim ang kamahinungdanon sa pagpahimulos sa estratehikong lokasyon sa Pilipinas aron makadani og dugang pamuhunan sa mga kritikal nga industriya.
