Personal nga mibisita si Pangulong Ferdinand Marcos Jr. sa People’s Ville I, II ug III sa Barangay Riverside, Calinan District, Davao City, kagahapong adlawa Hulyo 28, 2026.
Ayha kini miadto sa Davao City, miagi una ang Pangulo sa Davao de Oro diin iyang giinspeksyon ang Davao de Oro Provincial Hospital sa Montevista ug mitambong sa programang “Bawat Bayan Makikinabang: Davao de Oro, Davao del Norte ug Davao Occidental” nga gipahigayon sa Capitol Grounds sa Nabunturan.
Pag-abot sa People’s Ville, personal nga gisusi ni Marcos ang kahimtang sa relocation site ug ang implementasyon sa mga programa sa gobyerno alang sa mga benepisyaryo sa pabahay.
Nakig-istorya usab siya sa pipila ka mga residente aron masayran ang ilang kahimtang ug masiguro nga hapsay ang pagpatuman sa mga programa ug serbisyo nga gitagana alang kanila.
Subay sa report, kabahin ang maong pagbisita sa padayong pagmonitor sa administrasyon sa mga proyekto ug serbisyo sa gobyerno nga gitumong sa pagpauswag sa kalidad sa kinabuhi sa mga lumulupyo sa Davao Region.
