Gibatikos sa pipila ka netizens ug mga kritiko si Bise Presidente Sara Duterte human siya mitubag og “no comment” sa dihang gipangutan-an bahin sa Pax Silica atol sa usa ka media interview sa The Hague, Netherlands.
Base sa report, nadungog pa nga nangutana ang Bise Presidente sa ngalan sa maong inisyatibo ayha kini nag ingon nga wala siya’y komento kabahin niini.
Human sa mikatag nga video, adunay mga netizens nga nangutana sa iyang kahibalo sa mga internasyonal nga isyu, ilabina sa mga programa nga adunay kalabotan sa teknolohiya,seguridad, ug ekonomiya.
Sumala sa mga eksperto sa teknolohiya ug seguridad, ang kahibalo sa mga internasyonal nga inisyatibo sama sa Pax Silica importante alang sa mga lider sa gobyerno tungod kay adunay kini posibleng epekto sa nasudnong seguridad, proteksyon sa digital infrastructure, ekonomiya, semiconductor ug supply chains, internasyonal nga pakig-alyansa, ingon man sa paghimo og mga polisiya bahin sa artificial intelligence, cybersecurity ug data privacy.
Apan, adunay usab mga mipaluyo kang Duterte nga nag-ingon nga ang iyang pagdumili sa paghatag og komento o ang dili dayon pag-ila sa maong inisyatibo dili pasabot nga wala siya’y kahibalo o dili na niya matuman ang iyang katungdanan isip Bise Presidente.
Hangtod sa pagkakaron, wala pa nagpagawas og dugang nga pahayag ang kampo ni Duterte may kalabotan sa maong isyu.
