Maka-atbang pagusab ni Filipina tennis star Alex Eala (world no. 28) ang Canadian player nga si Leylah Fernandez sa Round of 16 sa Mubadala DC Open, pipila ka bulan human sa ilang unang panagsangka sa Stuttgart Open.
Nakasulod si Eala sa sunod nga hugna human sa impresibong come-from-behind victory batok sa kanhi world number four ug 2024 Paris Olympic gold medalist nga si Zheng Qinwen sa China, 4-6, 6-4, 6-1.
Samtang, sayon usab nga nakalusot si Fernandez sa opening round human niyang mapildi ang Polish player nga si Magda Linette, 6-1, 6-4.
Matud sa report, katapusang nag-atbang sila Eala ug Fernandez kaniadtong Abril sa Stuttgart Open diin midaog ang Canadian star, 6-1, 6-4.
Sa pagkakaron, ika-34 si Fernandez sa world rankings ug adunay usab dugong Pilipino. Nakadaog na usab siya og lima ka WTA singles titles ug nakaabot sa finals sa 2021 US Open ug quarterfinals sa 2022 French Open.
Gilauman nga mahimong usa na usab ka mainiton nga panagsangka ang ilang duwa alang sa puwesto sa quarterfinals sa torneyo.
