Pormal nga mihangyo si Senador Rodante Marcoleta pinaagi sa usa ka manifestation nga gisumite sa Senado aron tugotan siya ug si Senador Jinggoy Estrada nga makigbahin sa impeachment trial ni Bise Presidente Sara Duterte.
Base sa report, parehong anaa karon sa New Quezon City Jail Male Dormitory sa Payatas ang duha ka senador samtang nag-atubang sa nagkalainlaing kasong plunder sa Sandiganbayan nga walay gikatakdang piyansa.
Sa usa ka interbyu human sa iyang pre-trial conference sa Sandiganbayan, gikumpirma ni Marcoleta nga gilatid niya sa iyang manifestation ang legal nga mga rason nganong kinahanglan mangitag paagi ang Senado aron makatambong sila ni Estrada sa nagpadayong impeachment trial.
Matod sa senador, wala mausab ang iyang kahimtang isip usa sa 24 ka naglingkod nga mga senador bisan pa sa iyang pagka-priso, ug nagpabilin siyang adunay katungod sa pagbotar sa impeachment case.
Una nang mipadayag si Senate President Francis “Chiz” Escudero nga abli siya sa posibilidad nga makatambong si Marcoleta sa impeachment trial basta wala pa kini masuspenso isip senador.
Ang kasong plunder batok kang Marcoleta naggumikan sa giingong kapakyasan sa pagdeklarar sa ₱75 milyon nga campaign donations sa iyang Statement of Assets, Liabilities and Net Worth (SALN) ug Statement of Contributions and Expenditures (SOCE) sa 2025 nga eleksyon.
Samtang, ang kaso batok kang Estrada may kalabotan sa alegasyong nakadawat siya og ₱573 milyon nga kickbacks pinaagi sa giingong budget insertions alang sa flood control projects ubos sa 2025 national budget.
