Naglusad og daghang ballistic missiles ang Islamic Revolutionary Guard Corps sa Iran batok sa mga pwersa sa Estados Unidos sa Gitnang Silangan, apan tanan niini napugngan sa U.S. military.
Sumala sa U.S. Central Command, gilusad ang maong pag-atake alas 5:45 sa hapon Eastern Time, kagahapong adlawa Hulyo 28, 2026 isip kalit nga opensiba batok sa mga pwersa sa Amerika nga nagpabiling nakaalerto sa rehiyon.
Base sa report, malampusong na-intercept sa U.S. forces ang tanang ballistic missiles ug wala’y nahimong kadaot sa ilang mga tropa. Gikataho usab nga usa ka base militar sa Jordan ang posibleng target sa maong pag-atake.
Ang maong insidente nahitabo human sa halos duha ka semana nga sunod-sunod nga mga pag-atake tali sa Estados Unidos ug Iran, ug sa mubo nga pagpahunong sa panagsangka samtang naningkamot ang mga tigpataliwala nga mapasig-uli ang negosasyon ug mapanumbalik ang ceasefire.
Nahitabo usab kini tali sa nagpadayong panagbangi sa Strait of Hormuz, diin nag-ilog sa kontrol ang duha ka panig human sa pag-atake sa Iran sa pipila ka mga barko nga miagi sa maong agianan sa kadagatan.
Bisan napugngan ang tanan nga missiles, nagpabiling magbinantayon ang mga pwersa sa Estados Unidos ug giingong andam motubag sa bisan unsang bag-ong hulga aron mapadayon ang seguridad sa ilang mga tropa ug mga kaalyado sa rehiyon.
