Nanawagan si Senador Robin Padilla sa administrasyon nga unahon ang pagpaayo sa suplay sa kuryente ug sistema sa pampublikong transportasyon sa nasud sa dili pa ipadayon ang plano sa paglusag og rocket ngadto sa outer space.
Sa iyang Kontra-SONA sa Senado, gikanayon ni Padilla nga ang mga lokal nga panggamhanan kinahanglan hatagan og mas dakong kagawasan ug katungod sa pagpalambo sa mga proyekto sa enerhiya, ilabina sa mga hilit nga lalawigan nga kanunay makasinati og brownout.
Gihangyo usab sa senador nga paspasan ang pagtukod sa mga power plant aron matubag ang kakulang sa suplay sa kuryente sa nagkadaiyang bahin sa nasud.
Dugang pa niya, kinahanglan usab nga paayohon ang sistema sa transportasyon, ilabina sa Bicol Region, diin moabot gihapon og halos 12 ka oras ang biyahe gikan sa Metro Manila.
Gisuportahan usab ni Padilla ang pagbanhaw sa proyekto sa bullet train nga magdugtong sa Metro Manila ug Bicol aron mapamubo ang oras sa pagbiyahe sa mga pasahero.
Matod sa senador, bisan pabor siya sa plano sa gobyerno nga magpalupad og rocket sa 2027, mas angay unahon ang mga proyekto nga adunay direktang kaayohan sa adlaw-adlaw nga kinabuhi sa mga Pilipino.
Samtang, mipadayag usab siya og suporta sa Freedom of Information Bill ug sa sugyot balad-non nga magdili sa paggamit sa social media sa mga menor de edad.
