Misupak si Senadora Risa Hontiveros sa sugyot alang sa paggamit og nuclear energy isip dugayng solusyon sa taas nga presyo sa kuryente ug kakulang sa suplay sa enerhiya sa nasud.
Ang pahayag sa senadora misunod sa panawagan ni Pangulong Ferdinand Marcos Jr. atol sa iyang ikalimang State of the Nation Address (SONA) nga tun-an sa Kongreso ang posibilidad og paggamit sa nuclear energy aron mapalig-on ang sektor sa enerhiya sa Pilipinas.
Matod kang Hontiveros, dili angay nga magsalig ang nasud sa nuclear energy tungod kay wala’y kaugalingong tinubdan ang Pilipinas sa mga raw materials nga gikinahanglan alang niini.
Dugang pa niya, ang tanang radioactive materials kinahanglan pang angkaton gikan sa ubang nasud ug wala pa gihapon matukod ang usa ka kasaligan ug luwas nga sistema sa pagdumala ug paglabay sa radioactive waste.
Hinuon, giingon sa senadora nga mas angay tutokan sa gobyerno ang pagpalambo sa renewable energy sources sama sa solar ug hangin, nga aniya daghan pa ang wala mapahimusli ug mas luwas kumpara sa nuclear energy.
