Nanawagan si Senador Robin Padilla sa administrasyon nga unahon ang pagpaayo sa suplay sa kuryente ug sistema sa pampublikong transportasyon sa nasud sa dili pa ipadayon ang plano sa pagpalupad og rocket ngadto sa kalawakan.
Sa iyang Kontra-SONA sa Senado, matod ni Padilla nga kinahanglan hatagan og mas dakong katungod ang mga local government unit kon LGU aron makapalambo sa mga proyekto sa enerhiya, ilabina sa mga probinsya nga pirming makasinati og brownout.
Gidugang usab niya nga ang proseso sa pagtukod og mga power plant kinahanglan mapaspasan aron masulbad ang kakulang sa suplay sa kuryente sa nagkalain-laing bahin sa nasud.
Gihisgutan usab sa senador ang kahimtang sa transportasyon, ilabina sa Bicol Region, diin matud pa niya moabot gihapon og kapin 12 ka oras ang biyahe gikan sa Metro Manila.
Busa, iyang gisugyot nga buhayon pag-usab ang plano sa bullet train nga magdugtong sa Metro Manila ug Bicol aron mapamubo ang oras sa pagbiyahe.
Bisan nagpasabot siya nga nagsuporta sa plano sa gobyerno nga magpalupad og rocket sa 2027, giingon ni Padilla nga mas angay unahon ang mga proyekto nga direktang makatabang sa adlaw-adlaw nga kinabuhi sa mga Pilipino.
