Miabot sa kapin 600 ang ihap sa mga kaswalti sa mga sundalong Amerikano sa nagpadayong gubat batok sa Iran, base sa pinakabag-ong datos sa Pentagon. Sumala pa sa Defense Casualty Analysis System (DCAS) sa Pentagon, mikabat na sa 18 ka namatay ug 624 ka nasamdan nga sundalong Amerikano gikan sa paglunsad sa operasyon militar batok sa Iran niadtong Pebrero 28.
Dugang pa niini, matud pa sa Pentagon, gi-rebisa ang ilang casualty records human madugangan ang ihap sa mga nasamdan nga sundalo ug maapil pag-usab sa talaan ang upat ka sundalong namatay tungod sa mga pag-atake sa Iran.
Lakip sa mga giusab sa lista ang pagdugang sa bag-ong kategoryang “Overseas Operations” alang sa mga insidenteng may kalabotan sa mga operasyon sa gawas sa nasud. Kahinumduman nga gisusi pag-ayo ang casualty figures sa Pentagon human adunay mga kausaban sa unang ihap sa mga namatay ug nasamdan, nga nakapukaw og pangutana kabahin sa transparency sa pagreport sa epekto sa gubat.
Sa kasamtangan, padayon nga gibantayan ang kahimtang sa mga sundalong Amerikano samtang nagpadayon ang tensyon ug panagbangi tali sa Estados Unidos ug Iran.
