Padayon pang ginapangita ang 17 ka Vietnamese nga mga tripulante human maunlod ang gisakyang cargo vessel nga Khoi Nguyen 18 duol sa Kagitingan Reef sa West Philippine Sea (WPS), samtang unom pa ka tripulante ang bag-ong naluwas.
Sumala sa Philippine Coast Guard (PCG), ang barko naunlod kaniadtong Hulyo 25, 2026 sa gabii tungod sa dili maayong kahimtang sa panahon. Adunay kinatibuk-ang 62 ka tripulante ang sakay niini sa dihang nahitabo ang insidente.
Sa pagkakaron, 45 na ang kumpirmadong naluwas, samtang nagpadayon ang search and rescue operations alang sa nahibiling 17 ka mga na-missing.
Subay sa mando ni PCG Commandant Admiral Ronnie Gil Gavan, gipadala sa Coast Guard ang BRP Malapascua ug usa ka aircraft gikan sa Palawan aron motabang sa pagpangita sa mga nangawagtang human mangayo og tabang ang gobyerno sa Vietnam.
Padayon usab ang koordinasyon sa Philippine Coast Guard sa Vietnamese Coast Guard, pinaagi sa hiniusang search and rescue operations uban sa China aron mapadali ang pagpangita.
Gigamit usab sa mga awtoridad ang Search and Rescue Optimal Planning System, usa ka teknolohiya nga makatabang sa pagtino sa posibleng lokasyon sa mga na-missing aron mapadali ang rescue operations.
Samtang, nagdeploy usab ang China og daghang rescue vessels ug mga helicopter sa palibot sa Kagitingan Reef, diin sumala sa Chinese state media, ang pipila sa mga tripulanteng naluwas gi-rescue sa ilang mga responders duol sa Chinese-occupied reef.
