Nagpatuman ang administrasyon ni US President Donald Trump og bag-ong taripa nga 10% hangtod 12.5% batok sa 60 ka nasod nga giakusahan nga napakyas sa pagpugong sa paggamit og produkto nga gikan sa forced labor.
Girekomenda ni US Trade Representative Jamieson Greer ang maong taripa human sa dugay nga imbestigasyon ug public hearings. Apan, gisalikway sa mga target nga nasod ang mga alegasyon.
Epektibo kini sugod alas 12:01 sa kaadlawon karung Hulyo 24,2026. Apil sa mga naapektuhan ang dagkong trading partners sa Estados Unidos sama sa Mexico, Canada, China, ug European Union.
Matod ni Greer, ang lakang gitumong aron sulbaron ang giingong paglapas sa katungod sa mga mamumuo ug mga dili patas nga pamaagi sa patigayon.
Ang bag-ong taripa mopuli sa emergency tariffs ni Trump nga 10% hangtod 50% nga gi-invalidar sa US Supreme Court kaniadtong Pebrero.
Gipahibalo usab nga ang gobyerno sa US nagproseso og refund sa mga kompanya nga nakabayad sa mga taripa nga giingong ilegal, diin kapin $85 bilyon na ang naproseso hangtod Mayo.
Misupak usab ang pipila ka nasod sa maong desisyon, diin ang European Commission nagkanayon nga dili makatarunganon ang taripa, samtang ang Vietnam miinsistir nga hugot nilang gidili ang tanang porma sa forced labor.
Lakip sa mga nasod nga naapektuhan sa 12.5% tariff ang Pilipinas, China, Japan, South Korea, Australia, Brazil, India, Singapore, Thailand, ug Vietnam, samtang ang 10% tariff gipahamtang sa Canada, Mexico, European Union, United Kingdom, Indonesia, Malaysia, ug uban pa.
Gipasabot sa mga eksperto nga posible pa usab nga atubangon sa administrasyon ni Trump ang mga legal nga hagit batok sa maong polisiya, apan nagtuo sila nga mas lig-on ang posisyon sa gobyerno kung nasunod ang tanang legal nga proseso.
