Gihangyo sa Department of Migrant Workers (DMW) ang Office of the Ombudsman nga usbon ang pagsusi sa desisyon niini may kalabotan sa graft complaints batok kang kanhi OWWA Administrator Arnell Ignacio.
Gihimo kini human kasuhan sa Ombudsman si Ignacio og usurpation of official functions o pagbuhat og mga aksyon nga walay awtorisasyon sa giingong maanomalyang pagpalit og propiedad nga nagkantidad og ₱1.4 bilyon.
Bisan pa niini, gibasura sa Ombudsman ang mga kasong plunder batok kang Ignacio, hinungdan nga misumite ang DMW og motion for reconsideration kaniadtong Hulyo 17, 2026.
Sumala sa DMW, adunay responsibilidad si Ignacio, pipila ka opisyal sa OWWA, ug mga pribadong namaligya sa propiedad tungod kay gipadayon ang pagpamaligya bisan wala’y pagtugot gikan sa OWWA Board of Trustees.
Ang maong propiedad unta himuong temporaryong kapuy-an o halfway house alang sa mga overseas Filipino workers (OFWs) nga mopauli tungod sa emerhensya.
Giinsistir sa DMW nga mas taas og hapit ₱198 milyon ang presyo sa napalit nga propiedad kumpara sa appraisal sa Land Bank of the Philippines, nga giingong nakapahinabo og direktang kadaot sa gobyerno.
Adunay usab giingong paspas nga proseso sa pagbayad ug nawala ang 51 ka condominium units nga gibayaran sa gobyerno.
Matud ni DMW Secretary Hans Leo Cacdac, gibanabana nga hapit ₱97 milyon nga pondo sa katawhann ang posibleng nausik tungod sa maong transaksyon.
