Gipanghimangnoan sa Department of Environment and Natural Resources–Mines and Geosciences Bureau (DENR-MGB) ang liboan ka mga barangay sa nasod nga mahimong maigo sa sunod-sunod nga mga pagkalusno sa yuta atol niining semanaha tungod sa padayon nga kusog nga pag-ulan. Sumala pa sa DENR-MGB, gibase ang maong pahimangno sa pinakabag-ong 72-hour rainfall forecast sa state weather bureau gamit ang Global Spectral Model (GSM) ug Weather Research and Forecasting (WRF) rainfall threshold.
Dugang pa niini, gilauman nga ang padayon nga pag-ulan nga dala sa Tropical Depression Kiyapo, nga nagpalig-on usab sa hanging amihan, mahimong mopataas sa peligro sa mga landslide ilabina sa mga lugar nga delikado sa pagkahugno sa yuta.
Sa pinakabag-ong forecast, 15 ka rehiyon nga adunay kinatibuk-ang 6,947 ka barangay ang giila nga posibleng maapektuhan. Lakip niini ang Region 1 nga adunay 1,142 ka barangay, Region 2 nga adunay 579, Cordillera Administrative Region (CAR) nga adunay 524, Region 4A nga adunay 19, Region 4B nga adunay 145, Region 6 nga adunay 223, Region 9 nga adunay 70, Region 13 nga adunay 8, BARMM nga adunay 181, Negros Island Region (NIR) nga adunay 88, National Capital Region (NCR) nga adunay 1,359, Region 7 nga adunay 861, Region 10 nga adunay 857, Region 11 nga adunay 269, ug Region 12 nga adunay 622 ka barangay.
Sa kasamtangan, gipahimangnoan sa DENR-MGB ang mga residente sa mga maong lugar nga magpabiling alerto, magsunod sa mga pahimangno sa lokal nga mga awtoridad, ug mangandam sa posibleng pagbakwit kon adunay timailhan sa pagkalusno sa yuta o grabeng pagbaha.
Kahinumduman nga posibleng mosaka pa ang gidaghanon sa mga barangay nga maapektuhan samtang nagpadayon ang pag-ulan nga dala sa Tropical Depression Kiyapo ug sa gipalig-on nga hanging amihan.
