Gimanduan sa Senate Impeachment Court ang pagpa-subpoena sa bank records, tax records gikan sa Bureau of Internal Revenue o BIR, ug mga dokumento sa Anti-Money Laundering Council o AMLC ni Vice President Sara Duterte ug sa iyang bana nga si Atty. Manases “Mans” Carpio isip kabahin sa impeachment trial.
Ang maong desisyon gihimo sa impeachment court nga gipangulohan ni Presiding Officer Senator Francis “Chiz” Escudero human sa debate tali sa prosecution ug defense panels kabahin sa ikaduhang article of impeachment.
Matud sa impeachment court, dili mahimong ikonsiderar nga “fishing expedition” ang pagpangayo sa mga rekord sa transaksyon ug assets ni VP Sara gikan sa 2007 hangtod 2021, ug gibasura usab ang argumento sa defense panel nga sakop kini sa “prior term.”
Apil sa subpoena ang bank records sa magtiayon gikan sa 2007 hangtod 2021, apan wala giapil ang foreign currency deposit accounts, mga rekord sa ilang law firm ug sa duha ka corporate entities. Bisan pa niini, giingon ni defense spokesperson Michael Poa nga bisan gilauman na nila ang maong desisyon sa impeachment court, giila gihapon nila kini nga usa ka kapildihan sa ilang kampo.
Matud ni Poa, lig-on ang ilang legal nga basehan sa pagsupak sa mosyon sa prosecution, apan andam sila sa bisan unsang mahimong desisyon sa impeachment court tungod kay ilang gitagna nga posibleng mahatag ang maong subpoena.
Dugang pa niya, mas gusto unta sa defense panel nga dawaton sa impeachment court ang ilang pagsupak, apan mipadayon gihapon sila sa ilang depensa sa nagpadayon nga impeachment trial.
