Mikunhod og 20.6 porsyento ang crime rate sa Pilipinas sa milabayng kapin tulo ka bulan sukad gilunsad ang Safer Cities Initiative, sumala sa Philippine National Police (PNP).
Matud ni PNP Public Information Office chief Col. Allen Rae Co, bisan adunay sunod-sunod ug nag-viral nga mga krimen sa miaging mga adlaw, nagpakita ang opisyal nga estadistika nga mas luwas ang nasud karon kumpara sa nangaging mga bulan.
Gikan Abril 6 hangtod Hulyo 4, 2026, mikunhod ngadto sa 7,883 ang naitalang focus crimes gikan sa 9,506 ka kaso nga narekord sa miaging tulo ka bulan o gikan Enero 6 hangtod Abril 5.
Lakip sa mikunhod nga mga krimen ang carnapping, rape, physical injury, robbery, homicide, theft, ug murder.
Gipasabot sa PNP nga ang maong positibong kalamboan bunga sa Safer Cities Initiative nga nagtumong sa pagpalig-on sa seguridad sa mga siyudad, dugang presensya sa kapulisan sa mga komunidad, ug 21.74 porsyento nga pagsaka sa pagdakop sa mga nakalapas sa lokal nga mga ordinansa sama sa pag-inom sa pampublikong lugar, paggamit og karaoke lapas sa gitakdang oras, paglakaw nga maghukas, ug paglapas sa curfew sa mga menor de edad.
Matud sa PNP, ang pagdakop sa mga nakalapas sa maong mga ordinansa nakatabang sa pagpugong sa mas seryosong mga krimen sa dili pa kini mahitabo.
Giangkon sa kapulisan nga adunay pipila ka makapakurat nga mga krimen nga nahitabo sa miaging mga adlaw nga paspas mikaylap sa social media. Apan, bisan pa niini, gipasiugda sa ialng buhatan nga dili kini naghulagway sa kinatibuk-ang kahimtang sa seguridad sa Pilipinas tungod kay padayon nga nagpakita og pagkunhod ang kinatibuk-ang datos sa krimen.
