Gikondena sa Department of National Defense (DND) ang bidyo nga gipagawas sa Chinese state media outlet nga China Daily nga naghulagway sa mga Pilipino isip mga unggoy, ug gihulagway kini isip racist propaganda ug insulto batok sa katawhang Pilipino.
Matud ni Defense Secretary Gilberto Teodoro Jr., ang maong post sa Chinese state media outlet nagpakita sa giingong panglantaw sa Chinese Communist Party (CCP) ngadto sa mga Pinoy.
Gipatik ang kontrobersyal nga post sa China Daily kaniadtong Hulyo 10, 2026 duha ka adlaw sa wala pa ang ika-10 anibersaryo sa desisyon sa Permanent Court of Arbitration nga miila sa katungod sa Pilipinas sa iyang Exclusive Economic Zone (EEZ) sa West Philippine Sea.
Sa pahayag nga gipagawas kagahapong adlawa Hulyo 16 sa gabii, gikanayon ni Teodoro nga ang paghulagway sa mga Pilipino isip mga unggoy usa ka porma sa pagpakaubos ug propaganda batok sa nasud.
Makita sa maong video ang usa ka unggoy nga nagsul-ob og barong Tagalog ug salakot samtang daw gisugo sa mga karakter nga nagrepresentar sa mga Amerikano ug Hapones.
Gipakita usab sa maong hulagway ang unggoy nga giigo og water cannon sa dagat human makadawat og kopya sa arbitral award.
Sumala ni Teodoro, ang maong materyal usa ka pagyubit sa 2016 Arbitral Award ug nagpakita sa giingong pag-awhag sa kapintasan batok sa mga Pilipino ug mga sundalo.
Gitawag usab sa kalihim nga “contemptible propaganda” ang maong post ug gipasiugda nga kini nagpakita sa kakulang sa China sa makatarunganong depensa sa ilang mga posisyon kalabot sa West Philippine Sea.
Samtang, nagpagawas usab og pahayag si Rear Admiral Jay Tarriela, tigpamaba sa Philippine Coast Guard alang sa West Philippine Sea concerns, diin iyang gikondena ang bisan unsang porma sa racism.
Giingon ni Tarriela nga walay lugar ang rasismo sa karong panahon ug ang pagpakaubos sa laing kaliwat angayan lamang nga hukman ug kondenahon, samtang iyang gipasiugda nga dili mga unggoy ang mga Pilipino.
