Nagpabiling nakapriso si Senador Rodante Marcoleta sa Quezon City Jail-Male Dormitory human madakpan sa kasong plunder nga walay gitakdang piyansa, sa giingong pagdawat og ₱75 milyon nga campaign donations.
Una nang gimando sa Sandiganbayan ang pagbalhin kang Marcoleta human migawas sa independent medical examination sa University of the Philippines-Philippine General Hospital nga wala na siya’y pneumonia ug wala nay nakitang impeksiyon sa iyang baga.
Kahinumdoman nga mihangyo ang kampo ni Marcoleta nga magpabilin una siya sa PNP Hospital tungod sa iyang kahimtang sa panglawas nga posibleng adunay kalabotan sa pneumonia ug uban pang mga sakit nga iyang giatubang.
Kaubang ni Marcoleta sa kaso ang kanhing mambabalaod nga si Mike Defensor ug ang mga negosyanteng sila Joseph Espiritu ug Aristotle Viray, nga mipasaka og not guilty plea. Wala pa usab ma-arraign si Marcoleta tungod kay pending pa ang iyang mosyon nga ipawagtang ang kaso batok kaniya.
Gawas sa kasong plunder, nag-atubang usab ang mga akusado og kaso sa paglapas sa Presidential Decree No. 46, nga nagdili sa mga opisyal sa gobyerno sa pagdawat og regalo o bisan unsang benepisyo tungod sa ilang posisyon.
Nakakita usab ang Sandiganbayan og probable cause sa maong kaso batok nila Marcoleta ug Defensor. Gitakda sa korte ang arraignment nila Joseph Espiritu ug Sen. Marcoleta sa Hulyo 22, 2026.
