Gidepensahan ni Senator-Judge Alan Peter Cayetano si Davao City Mayor Sebastian “Baste” Duterte batok sa mga alegasyon nga mahimo siyang adunay kalambigitan sa gitawag nga “Operation Romanov.”
Gibuhat kini ni Cayetano human mihatag og bag-ong pahayag si National Bureau of Investigation (NBI) Regional Director Atty. Jeremy Lotoc sa ikalimang adlaw sa impeachment trial ni Vice President Sara Duterte.
Atol sa pagpangutana nila Senator-Judges Raffy Tulfo ug Panfilo “Ping” Lacson, nagkanayon si Lotoc nga dili si VP Sara ang giingong target sa hulga, kondili si Pangulong Ferdinand Marcos Jr. ug ang iyang pamilya.
Matud ni Lotoc, nakit-an sa mga imbestigador sa National Bureau of Investigation (NBI) ang usa ka pahayag ni Mayor Baste atol sa usa ka rally kaniadtong Enero diin iyang gihisgutan ang nahitabo sa Romanov family sa Russia isip pasidaan kang Pangulong Marcos.
Bisan pa niini, giingon ni Cayetano nga dili angay dayong isipon nga hulga ang maong pahayag sa alkalde ug adunay kalainan ang usa ka pasidaan ug usa ka diretsong hulga.
“It’s fair that you mentioned him. It’s fair that you mentioned him in your investigation. But I don’t think we should draw a conclusion here that Mayor Baste was threatening the First Family,” pahayag ni Cayetano.
Gipasiugda sa senador nga kinahanglan magmatngon ang impeachment court sa paghimog konklusyon, ilabina kay wala pa klaro kung ang paghisgot sa “Romanov” adunay direktang kalambigitan sa usa ka plano o simboliko lamang.
Dugang pa niya, kinahanglan nga patas ang korte dili lamang sa First Family kondili lakip na usab kang Mayor Baste ug sa pamilyang Duterte samtang nagpadayon ang pagdungog.
