Gisita si Senate Impeachment Court Presiding Officer Sen. Francis “Chiz” Escudero ang abogado ni Vice President Sara Duterte tungod sa iyang pahayag kabahin sa Bar examination rating sa Bise Presidente.
Nahitabo kini atol sa pagpadayon sa impeachment trial samtang nag-cross examination si defense counsel Atty. Mark Vinluan kang National Bureau of Investigation (NBI) Regional Director Atty. Jeremy Lotoc, nga testigo sa House prosecution panel.
Atol sa pagpangutana, giingon ni Vinluan nga usa ka maayong abogado si VP Sara ug nakapasar sa Bar Exam sa unang higayon nga adunay 80 porsiyentong marka.
Dugang pa niya, mas taas kuno ang grado sa Bise Presidente kaysa sa kadaghanan sa mga abogado nga anaa sa impeachment court.
Nagpadayag dayun og si House prosecution panel member Atty. Amando Virgil Ligutan ug miingon nga walay kalabotan ang maong pahayag sa isyung gihisgutan sa pagdungog.
Miuyon si Sen. Escudero ug gipahimangnoan si Vinluan nga likayan ang mga pahayag nga mahimong makainsulto sa ubang mga abogado nga anaa sa korte.
Matod ni Escudero, daghan usab ang mga abogado sulod sa impeachment court ug walay nakahibalo kung kinsa ang adunay mas taas nga grado sa Bar examinations.
